وَإِذَا قِيلَ لَهُمْ لاَ تُفْسِدُواْ فِي الأَرْضِ قَالُواْ إِنَّمَا نَحْنُ مُصْلِحُونَ * أَلا إِنَّهُمْ هُمُ الْمُفْسِدُونَ وَلَـكِن لاَّ يَشْعُرُونَ
﴾البقرة (11-12)
************************
عوضين: قولى يا حاج حسين.. إلا اسم النبى حارسها بنتك الكبيرة، ربنا كرمها ولا لسة؟
حسين: لا ولله لسة يا حاج عوضين... ماجاش النصيب
عوضين: يعنى محدش متكلم عليها؟
حسين: لسه.. خير ان شاء الله؟
عوضين: عندى ليها عريس إنما يعجبك. حسونة ابن جوز أخت مرات عم ابن خالتى... راجل كسيب و أخلاقه كويسة... ده أنا لو كان عندى بنت ماكنتش ألاقيلها أحسن منه... نقول نتقابل يوم الخميس؟
حسين: ربنا يجيب اللى فيه الخير......
(الحاج عوضين فى بيته)
عوضين: بقولك ايه يا أم شحاته النهاردة أخدت ميعاد من الحاج حسين، عشان يقابل حسونة عشان اسم النبى حارسها بنته..
أم شحاتة: أيوة يا حاج بس انت عارف إن حسونة ده واد فلاتى و صرماح و بخيل بخل الدنيا و الأخرة غير انه بتاع سهر وصاحب كباية..!!! والبت بنت الحاج حسين يعنى غلبانة و منكسرة كدة و مش هتسلك معاه..
عوضين: أيوة يا ستى ماقلناش حاجة... بس واحنا مالنا.. احنا نعمل الخير و نرميه فى البحر و يا بخت من وفق راسين فى الحلال..
أم شحاتة: أيوة يا حاج.. بس ده واد بطال خالص..
عوضين: أهو بكره ربنا يهديه على إيديها... و هى وشطارتها..!!!
أم شحاتة: على رأيك..
(تتم الخطبة و يكتشف الحاج حسين سوء أخلاق خطيب بنته بعد أن تكبدوا تكاليف باهظة للخطبة و الجهاز و الذى منه، غير معاناة بنت الحاج حسين النفسية...)
حسين: كدة برضه يا حاج عوضين..!!! هو ده قريبكم اللى أخلاقه كويسه و تعرفه زى ولادك ولو كان لك بنت ماكنتش تعزها عليه..!!!
عوضين: ياخويا و أنا كان إيش عرفنى... أنا أعرفه معرفة قرايب... انتو اللى ناسبتوه و قعدتوا و اتكلمتوا معاه... معرفتوش ليه تحققوا معاه كويس و تعرفوا حقيقته و انتم لسة عالبر..!!
حسين: حسبنا الله و نعم الوكيل...
*(تمت)*
10 comments:
الله يكرمك يا كليو
لانى فعلا من اسبوع تقريبا واحد زميلى سالنى على واحدة جارتى لانه عايز يتقدم لها
وانا عارف ان عيلتها مش ولابد شوية
فقلتله كل الى اعرفه بصراحة وقلتله يا ابن الناس ابعدعن الناس دى احسنلك
بس بعدها مش عارف ليه زعلت مع انى متاكد انهم مش هينفعوا مع بعض خالص
لكن موضوعك ده طمنى الصراحة واكدلى انى عملت الصح
على فكرة اكتر حاجة بتغظنى لما واحد يسال التانى عن شخص معين فيقوله انه اوانهاعشرة على عشرة مع ان سيرته او سيرتها على كل لسان والراجل الى بيسال غريب وما يعرفش حاجة وحط ثقته فى الشخص الى بيساله .
ولما اساله ليه عملت كده يرد عليا ويقولى يا عم حرام عليك احنا عندنا بنات وعايزين نسترها ومش عايزين نوقف حال بنات الناس
يعنى علشان يستر البنات الى عنده يخرب بيت ناس وثقت فيه
بجد نفسى كل واحد يعمل كده ويشهد شهادة زور زى ما سمتيها يوقع فى واحد ابن حلال زيه بالظبط ويوقعه فى شر اعماله
أهلا حسين..
أوعى تندم أبدا انك عملت الحق "الله لا يستحيى من الحق" واللى سألك عن رأيك يعنى بيحملك "أمانة".. على الأقل يوم ما يحصل لا قدر الله حاجة وحشة ماحدش يرجع يدعى عليك ويقول انك خدعته..
سلام عليكم
اهلا يا عن كليو
انا اول مرة ادهل على مدونتك ، اسلوبك رائع
و القصة دى بتبين ان شعبنا المصرى بيحب يدخل نفسه فى كل حاجة المهم يكون له يد فى كل حاجة حتى لو كانت وحشه
بس
و سلام عليكم
انا مش عارف اسمي دا ايه
حسن نيه
ولا عبط
ولا استهبال
انا هسميه زي ما انت قلتي شهاده زور
بس ليه احنابقينا كده
لما نشوف تاريخنا هانلاقي ان كان عندنا علم الجرح والتعديل وكان بيكلم عن مين عن صحابه وتابعين
يعني ميراثنا المفروض انه نزيه وصادق
جبنا الخيبه دا منين
التزوير بقه الحاسه التامنه عند الناس الوقتي
أهلا أدم... المدونة نورت بتشريفك ليها وأتمنى ماتكونش أخر مرة :-)
الفكرة إن الناس بتحب يبقى ليها فضل ونصيب فى الشكرانية من أى حاجة حلوة مهما كانت عواقبها فى الأخر.. خصوصا لو لاعواقب دى مش هتقع على راسهم هم.. ولما حد يلوم عليهم يتنصلوا من المسئولية ويقولوا واحنا مالنا.. ده سلوك أنا مش قادرة أهمه من المصريين ومش قادرة أفهم مكنون نفسية اللى يقبل على نفسه انه يروج بضاعة فاسدة ممكن تقتل اللى يشتريها!!
ماسك العزيز.. أظن الناس بقى فيهم (أو يمكن فيهم طول عمرهم) حب الأذية على رأى محمد عبد الوهاب فى الإنية الشهيرة اللى بتقول "صعبان عليا أشوف غيرى عال متهنى) أو الأغنية الأخرى اللى بتقول (ليه يناموا وانتى تصحى يا عيونى..ليه؟؟ ليه؟؟ ) !!!
بوست جامد ومهم يا كليو بس انا من فتره اتحطيت في موقف مشابه فقبل ما اجاوب اللي سألوني حبيت اعرف رأي الدين في الموضوع وسألت اكتر من شخص عن كيفية التصرف في الحاله دي من الناحيه الدينيه وكانت الاجابه ان انا مقولش الشخص كويس ولا اقول ان هو وحش واكتفي بأني مش هقدر افيده في الموضوع ده ووالله اللي عايز يفهم لوحده يفهم اللي مش عايز يسأل حد تاني بحيث مكونش غشيت حد وفي نفس الوقت معيبتش في حد
معلش طولت عليكي
عزيزى الفاضل داى دريمينج..
ألا تعتقد معى أن "فضيلة" من أفتاك بهذا، إنما أفتاك بكتم الشهادة؟
بعد اذنك يا كليو انا عايز ارد على الاخ داى دريمنج
يا ترى حضرتك شايف ان ده هو الحل ... طيب افرض ان الشخص الى بيسالك فهمه تقيل شوية واعتقد ان السكوت علامة الرضا يعنى تفكيره هداه لكده
لان مش معقول انك هتعرف انه راجل وحش وما تقلوش انه وحش
يا ترى فى حالة زى دى مش هتحس بانك كاتم للشهادة فعلا وظلمت اسرة كاملة معاك
والحقيقة النقطة دى بتثير حاجة تانية مهمة جدا
يا ترى لو ابديت راى فى شخص فى العمل ... يعنى رئيسى بيسالنى عن زميل وشغله ايه فى القسم
والزميل ده شغله سىء جدا والفلوس الى بيقبضها حرام عليه لانه مش بيشتغل خالص
يا ترى المطلوب منى وقتها انى اقول انا معرفش او مش هتكلم عن الراجل ده
وفى الحالة دى مش هبقى بضيع حق واحد تانى بشتغل وطفحان الدم فى الشغل
اما اذا كنت خايف ان الموضوع ده يحسب عليك كغيبة فاسمحلى الكلام ده لما نكون قاعدين مع بعض بنحكى ونتساير على القهوة ونجيب فى سيرة فلان وعلان
لكن لما الموضوع يكون هيقف عليه مستقبل اسرة او حقوق ناس فلازم تقول الحق ولو على رقبتك
واسف لانى طولت شوية فى مداخلتى دى بس حضرتك اثرت نقطة مهمة جدا
سلام
الله يباركلك يا حسين.. شرحت اللى كنت عاوزة أقوله بالظبط.. :-)
Post a Comment