الصف -3
أو كما يقول المثل الشعبى "من بره هله هله ومن جوة يعلم الله"
رجل صارم جدا... أسد فى بيته وفى الغرزة نعامة.. يصرخ فى بيته فيتهتز الجدران... مظهر وقور وجه أميل للعبوس جدية فى التعامل ... يذيق أهل بيته الأمرين ويمشيهم على عجين ما يلخبطوش... ولكنه فى الوجه الأخر... رقاق محترف.. يجيد ضرب الرق والدف للعوالم اللاتى ينفق عليهم ثروته ويهدر على صدروهن وقاره.. لا أتحدث هنا عن شخصية "سى السيد" لنجيب محفوظ... ولكنى أتكلم عن "المزدوجين".
الرواية العالمية د. جيكل أند مستر هايد تتحدث عن الطبيب الإنسان الرحيم الدمث الخلق.. الذى يتحول ليلا إلى سفاح متوحش يسفك الدماء وينتهك الأعراض.
"قمة الحرفنة أنك تكون فاسد، لكن من برة بتبرق وزى الفل" جملة قالها لى صديق وأثبتت لى أننا مجتمع محترفين.
فالأب الذى ياحسب ابنته على التأخير واللبس القصير لا يتورع أن يتحرش بالخادمة، والصحفى الذى اتخذ البحر مدادا لكلماته التى ينادى فيها الناس بالفضيلة ومحاربة الفساد، يسهر الليالى فى الحانات مع فتيات الليل ومدعيات الفن...
سى السيد أو مستر هايد يعيش بيننا فى كل مكان... قد يكون أبا.. أستاذا جامعيا.. أو نشط فى منتدى انترنت... قد يكون رجل دين ترزى فتاوى أو نائب مجلس شعب مزور ...
3 comments:
مبروك البلوج
اولا مبروك على البلوج ولو انها متاخرة شوية
اما من ناحية دكتور جيكل ومستر هايد فانا شايف اننا كلنا فينا الاتنين مع بعض
يعنى ما فيش واحد طيب على طول الخط ولا شرير على طول
لكن نقدر نقول ان الشخص الطيب هو الى تصرفاته الطيبة والخيرة اكثر من افعاله الشريرة والعكس صحيح طبعا
ومن هنا يظهر بوضوع مجاهدة النفس لان كل نفس بشرية بتجنح لمحظورات كتير ودى بتفرق من شخص لاخر فى مدى تحكمه فى نفسه
الفاضل حسين.. ألف شكر عهلى التهنئة.. ولا متأخرة ولا حاجة... :)
كلامك كله مظبوط.. ربنا يباركلك.. بس اللى أنا بتكلم عليه دكتور جيكل/ مستر هايد أقصد به الإنسان المزدوج أو المنافق.. عندك مثلا شخصية سى السيد.. الراجل الوقور المحترم صاحب الهيبة، اللى هو ماجن خليع وضارب رق ممتاز.. أو الإنسان اللى بيظهر حد بعيد من الطيبة وباطنه حد بعيد من الشر... يعنى مثلا عشان أقربلك المثال على دكتور جيكل/ مستر هايد... فاكر شخصية زكى رستم فى فيلم رصيف نمرة خمسة؟؟ "ررررووح يا أخخخخخخخخى.. الله يعمررررررر بيتكككك".. أهو الراجل الطيب الخير ذو البر والأحسان وصاحب الشاويش مش فاكرة اسمه ايه ((اللى هو فريد شوقى)) هو نفسه تاجر المخدرات القاتل السفاح المجرم اللى بيحاول يخرب بيت فريد شوقى.. ده طبعا على مجرد مثال ولينا اننا نقيش عليه شخصيات كتير بنشوفها كدة فى المجتمع...
تحياتى...
Post a Comment